Mendebaldeko Sahararen eta Kolonbiaren arteko elkarlan-topaketa, erbestean dauden emakumezko defendatzaileek giza eskubideak babesten jokatzen duten rolari buruzkoa
Apirilaren 19an, Mendebaldeko Sahararen eta Kolonbiaren arteko elkarlan-topaketa. giza eskubideak babesteko mekanismoen aurrean eragiteko estrategiak: erbestean dauden emakumezko defendatzaileen rola topaketa egin zen Bilbon. 22 pertsona izan ziren topaketan, Kolonbiako, Mendebaldeko Saharako eta Euskal Herriko zortzi giza eskubideen erakunde eta mugimendu feminista ordezkatzen.
Hori horrela, Unión Nacional de Mujeres Saharauis (espainiar estatuan), Hijas de las Nubes eta Mujeres del Mundo erakundeetako, Mujeres al Derecho kolektiboko, eta Urabá Colombia-Suiza eta Bachué elkarteetako kide diren emakumezko sahararrak eta kolonbiarrak izan ziren jardunaldian.
Topaketaren helburua izan zen elkarrekiko elkarrizketa- eta ikasketa-espazio bat ematea emakumezko defendatzaile sahararrei eta kolonbiarrei, giza eskubideen nazioarteko mekanismoen aurrean erbestetik eragiteko estrategien inguruan. Gainera, erbestean eta diasporan dauden emakumezko defendatzaileen antolakuntza politikoa indartzen lagundu nahi izan du.
Jarduera honen bidez, geografiaren aldetik urrunekoak diren baina lan-estrategiei dagokienez hurbilekoak diren errealitateak hurbildu ziren, eta truke-esparru positibo bat eraiki zen sinergiak identifikatzeko eta giza eskubideak tokiko, eskualdeko eta nazioarteko mailan babestean oinarritzen diren sareak sustatu ziren.
Parte-hartzaileek nazioarteko mekanismoen aurrean eragiteko egin ohi duten lanaren indarguneak eta mugatzaileak identifikatu zituzten, eta egungo harrera-lurraldeko tokiko antolakuntzarekin lotutako beste bizipen batzuk partekatu ahal izan zituzten, bai eta jatorrizko herrialdeen borrokekiko beharrezko zubiak ere.
Topaketaren amaiera oso hunkigarria izan zen, eta mundu posible, beharrezko eta urgentea sortzeko eta horretan sinesteko indarra aldarrikatu zen, emantzipazio-borroken eta giza eskubideen aldeko elkartasunetik abiatuta, ikuspegi feministetatik.
Información sobre otras actividades relacionadas:
Lotutako albisteak
